ឯកឧត្ដម កែវ រ៉េមី និងថ្នាក់ដឹកនាំ មន្ត្រីរាជការ និងមេធាវីសិទ្ធិមនុស្ស នៃគណៈកម្មាធិការសិទ្ធិមនុស្សកម្ពុជា បានអញ្ជើញនាំយកនូវសម្ភារ: និងថវិកាជូនមន្ទីរពេទ្យគន្ធបុប្ផាទី៥
ឯកឧត្ដម កែវ រ៉េមី និងថ្នាក់ដឹកនាំ មន្ត្រីរាជការ និងមេធាវីសិទ្ធិមនុស្ស នៃគណៈកម្មាធិការសិទ្ធិមនុស្សកម្ពុជា បានអញ្ជើញនាំយកនូវសម្ភារ: និងថវិកាជូនមន្ទីរពេទ្យគន្ធបុប្ផាទី៥
នៅរសៀលថ្ងៃសៅរ៍ ១កេីត ខែភទ្របទ ឆ្នាំខាល ចត្វាស័ក ព.ស.២៥៦៦ ត្រូវនឹងថ្ងៃទី២៧ ខែសីហា ឆ្នាំ២០២២ ឯកឧត្ដម កែវ រ៉េមី រដ្ឋមន្ត្រីប្រតិភូអមនាយករដ្ឋមន្ត្រីនិងជាប្រធានគណៈកម្មាធិការសិទ្ធិមនុស្សកម្ពុជា រួមជាមួយថ្នាក់ដឹកនាំ មន្ត្រីរាជការ និងមេធាវីសិទ្ធិមនុស្ស នៃគណៈកម្មាធិការសិទ្ធិមនុស្សកម្ពុជា បានអញ្ជើញនាំយកនូវសម្ភារ:រួមមាន អាល់កុល ម៉ាស និងថវិកា ជូនមន្ទីរពេទ្យគន្ធបុប្ផាទី៥ (ក្បែរវត្តភ្នំ)។ ក្នុងឱកាសនោះដែរ ឯកឧត្តម កែវ រ៉េមី បានអញ្ជើញធ្វើដំណើរទស្សនកិច្ច នៅមន្ទីរពេទ្យគន្ធបុប្ផាទី៥ ផងដែរ។
ឯកឧត្ដមប្រធាន បានសម្ដែងនូវការកោតសរសេីរចំពោះ លោកវេជ្ជបណ្ឌិត Beat Richner ដែលជាស្ថាបនិកនៃមន្ទីរពេទ្យគន្ធបុប្ផា និងជាបិតាសង្រ្គោះកុមារកម្ពុជា។ ឯកឧត្តមប្រធានសូមកោតសរសើរផងដែរចំពោះថ្នាក់ដឹកនាំ មន្ត្រី និងបុគ្គលិកមន្ទីរពេទ្យទាំងអស់ ដែលតែងតែខិតខំប្រឹងប្រែងអស់កម្លាំងកាយចិត្តក្នុងការមេីលថែទាំកុមារទាំងអស់ ដែលមកទទួលការពិនិត្យព្យាបាលនិងសម្រាកនៅមន្ទីរពេទ្យគន្ធបុប្ផា។
ជាមួយគ្នានេះដែរ ឯកឧត្តម កែវ រ៉េមី បានថ្លែងអំណរគុណចំពោះថ្នាក់ដឹកនាំ មន្ត្រីរាជការ និងមេធាវីសិទ្ធិមនុស្សនៃគណៈកម្មាធិការសិទ្ធិមនុស្សកម្ពុជា ដែលបានចូលរួមចំណែកក្នុងការឧបត្ថម្ភមន្ទីរពេទ្យគន្ធបុប្ផា។
ឯកឧត្ដមប្រធានមានប្រសាសន៍ថា គណៈកម្មាធិការសិទ្ធិមនុស្សកម្ពុជានឹងបន្តចូលរួមជាមួយមន្ទីរពេទ្យគន្ធបុប្ផាក្នុងបេសកកម្មជួយសង្គ្រោះកុមារកម្ពុជាជាបន្តបន្ទាប់ទៀតនាពេលខាងមុខ ។
