លោកជំទាវ អ៊ុច និពន្ធ បានសម្ដែងនូវការអបអរសាទចំពោះ អាយឆា-ឥណ្ឌូណេស៊ី ក្នុងតួនាទីជាប្រធានអាយឆាឆ្នាំ២០២៣
លោកជំទាវ អ៊ុច និពន្ធ បានសម្ដែងនូវការអបអរសាទចំពោះ អាយឆា-ឥណ្ឌូណេស៊ី ក្នុងតួនាទីជាប្រធានអាយឆាឆ្នាំ២០២៣
តំណាងដ៏ខ្ពង់ខ្ពស់ ឯកឧត្តម កែវ រ៉េមី រដ្ឋមន្ត្រីប្រតិភូអមនាយករដ្ឋមន្ដ្រី ប្រធានគណៈកម្មាធិការសិទ្ធិមនុស្សកម្ពុជា (គ.ស.ម.ក.) និងជាតំណាងកម្ពុជាប្រចាំគណៈកម្មការអន្តររដ្ឋាភិបាលអាស៊ានទទួលបន្ទុកសិទ្ធិមនុស្ស (អាយឆា) លោកជំទាវ អ៊ុច និពន្ធ សមាជិកនិងជាអគ្គនាយិកា នៃអគ្គនាយកដ្ឋានរដ្ឋបាលនិងបណ្ដឹង នៃ គ.ស.ម.ក. បានដឹកនាំគណៈប្រតិភូ អាយឆា-កម្ពុជា ចូលរួមកិច្ចប្រជុំអាយឆាលើកទី៣៦ ចាប់ពីថ្ងៃទី២៧ ខែកុម្ភៈ ដល់ថ្ងៃទី០៣ ខែមីនា ឆ្នាំ២០២៣ ដែលប្រព្រឹត្តទៅនៅលេខាធិការដ្ឋានអាស៊ាន រដ្ឋធានីហ្សាការតា ប្រទេសឥណ្ឌូណេស៊ី។
ក្នុងនាម ឯកឧត្តម កែវ រ៉េមី តំណាងអាយឆា-កម្ពុជា លោកជំទាវ អ៊ុច និពន្ធ បានសម្ដែងនូវការអបអរសាទចំពោះ អាយឆា-ឥណ្ឌូណេស៊ី ក្នុងតួនាទីជាប្រធានអាយឆាឆ្នាំ២០២៣។ នៅថ្ងៃទី១នៃកិច្ចប្រជុំនេះ បានអនុម័តលើរបៀបវារៈនៃកិច្ចប្រជុំ ហើយបានពិភាក្សាលើកិច្ចការមួយចំនួន និងកម្មវិធីសកម្មភាពអាទិភាពរបស់អាយឆាឆ្នាំ២០២៣។ នៅថ្ងៃនេះដែរក៏មានកិច្ចប្រជុំរវាង អាយឆា និងគណៈប្រតិភូសហភាពអឺរ៉ុប ដែលបានពិភាក្សាពីកិច្ចសហប្រតិបត្តិការកន្លងមក និងគម្រោងនៃកិច្ចសហប្រតិបត្តិការបន្តរវាងអាយឆា និងសហភាពអឺរ៉ុប។
នៅក្នុងកិច្ចប្រជុំលើកទី៣៦នេះ អាយឆា-កម្ពុជា នឹងធ្វើបច្ចុប្បន្នភាពអំពីការងារមួយចំនួនអំឡុងពេលកម្ពុជាធ្វើជាប្រធានអាយឆាឆ្នាំ២០២២ រួមទាំងគម្រោងដែលកម្ពុជាគ្រោងនឹងរៀបចំធ្វើក្នុងឆ្នាំ២០២៣ ក្នុងនោះរួមមាន៖ ១. កិច្ចសន្ទនាថ្នាក់តំបន់៖ការចែករំលែកការអនុវត្តល្អៗស្ដីពីការលើកកម្ពស់សិទ្ធិមនុស្សអំឡុងពេលរីករាលដាលនៃជំងឺកូវីដ-១៩ ក្នុងតំបន់អាស៊ាន និង ២. ការតស៊ូមតិ (ជជែកដេញដោល) ស្ដីពីសិទ្ធិមនុស្សអាស៊ាន៕
